ရှုခင်းများ (၄)
သင်္ဘောပျက်တွေ ရတနာတွေ
အရိုးစုတွေကို သိုဝှက်လို့
ပင်လယ်ဟာ ...။
မေ့လွယ်ပျောက်လွယ်တဲ့ လူတွေ
ကမ်းခြေမှာ ...
လှိုင်းကို အပျော်စီးကြတယ်။
သစ္စာနီ
--------------------------
ရှုခင်းများ (၇)
ငါ
ရင်ခုန်ခဲ့ဖူးတယ်။
ဟောဒီမှာ ...
တိုက်တာတွေ ပိုကြီးလာတယ်
လူတွေ ပိုသေးလာတယ်
မော်တော်ကားတွေ ပိုများလာတယ်
သစ်ပင်တွေ ပိုရှားလာတယ်
ဆိုင်းဘုတ်တွေ ပိုပေါလာတယ်
တံတွေးတွေ ပိုပေါလာတယ်
ရန်ကုန် ...
သွေးဆုံးတာ ကြာပြီ။
သစ္စာနီ
--------------------------
ရှုခင်းများ (၆)
ကောင်းကင်မှာ
တိမ်တွေ တရွေ့ရွေ့။
တံတားအောက်မှာ
ရေတွေ တရွေ့ရွေ့။
နာရီထဲမှာ
လက်တံတွေ တရွေ့ရွေ့။
မှန်ထဲမှာ
ငါ့မျက်နှာတရွေ့ရွေ့။
သစ္စာနီ
--------------------------
ရှုခင်းများ (၁)
သစ်ပင်ပုပုတွေနဲ့
လက်ဖက်ရည်ဆိုင်။
ထိုင်ခုံပုပုမှာ
ခပ်ပုပုလူတွေ ထိုင်လို့။
သူတို့ ...
အရိပ်တွေသာ ရှည်လျားကြတယ်။
သစ္စာနီ
ဇာတိပေးသော နာမ် စာအုပ်မှ။
--------------------------
No comments:
Post a Comment