နင်က အပွင့်ကိုစားတယ်
အရွက်ကို ခိုးတယ်
အကိုင်းချိုးပြီး
နင် .... က နေတယ်ပေါ့ …
လွန်းတင်ထားတဲ့ကြိုးနဲ့
ငိုက်မြည်းခြင်းကိုဆွဲချ
ပန်းရနံ့တွေမွှေးမြလာတဲ့
နင့် အကြွေဝိဉာဉ်
သူငယ်တော်ရုပ်သေးထဲ
ငါ ယူငင်အသက်သွင်းထားတယ်…
ရုတ်တရက်ကြီး
ပန်း ရုပ်သေးက က နေရာက ကြိုးပြတ် …. ‘‘ … ’’
ကတ္တရာ လမ်းက ငေါက် ခနဲ ထ ထိုင်တယ် ..
သိပ်မလန့်သွားပါနဲ့ ပရိတ်သတ်ကြီးရယ်
ပရိတ်ရွတ်ဖို့မဟုတ်ပါဘူး ….
လိုင်းမမိတော့တဲ့ ဧရိယာမှာ
မကျွတ်မလွတ် နှလုံးခုန်နှုန်း ….
အတိအကျပြောရရင် နှလုံးခုန်နှုန်း အနီ …
……… ကွဲ ….. ဖို့ …
ပန်း ရုပ်သေးပွဲမှာ …
လိုင်းဖြတ်ခံလိုက်ရတဲ့
နှလုံးသားအဆံချောင် ဇောက်ထိုးကြီး ….
တဟီး ဟီး ဟီး နဲ့ ….
ဒါကိုရော ဘယ်လိုအသံထွက်ကြမလဲ
ငိုတာလား ရီတာလား …
ဘာလုပ်ပြမှန်းမသိတဲ့
ပန်းခြေရာ ရုပ်သေး ကကွက် …
ရင်သေပုတုန်းတွေ လိုက်ဟက်နေပုံက
အပုတ် မ ကို အသက်သွင်းနေတဲ့ မြို့သေပွဲ …
လက်မှတ်ဗလာတစ်ရွက်နဲ့
တစ်ဆွေလုံး တစ်မျိုးလုံး
မီးခိုးတိတ်အောင် ရီကြအုံးမယ် ..
ပန်း ရုပ်သေးရေ ….
နင့်ကိုခေါ်တာမဟုတ်ဘူး …
အင်္ဂါ ဦးမှာ ပြတ်ကျသွားတဲ့ ဂြိုလ်တစ်လုံးက
အနီရောင် မိုးတွေရွာဖူးတဲ့ အရပ်မှာ ..
ကိုမာ ဖြစ်နေတယ်လေ …
သက်ရက်ညွှန့်တွေထွက်လာတာကို
နွေ …………… လို့ ခေါ်ရင်
ပန်း .. ရုပ် … သေး …
ဆေးလိပ်မီးတွေ တိုဝင်သွားတာကို
ရောဂါ ……….. လို့ ခေါ်ကြတယ်
‘‘တောက်တဲ့’’…. ပါကွာ
မိုးခေါင်နေတာ
အပြစ်နှစ်မျိုးဖြစ်ရင်
ပန်း … ရုပ် … သေး …
နွယ်ပင်မြက်ပင်တွေ ဆေးဖက်မဝင်တာ
သစ္စာကျိုး အလင်္ကာရဲ့
ရှုမျှော်ခင်း အသေတခြမ်း
အိုဗာအိုက်တင် လုပ်နေတာဖြစ်တယ် …
ကြိုးပြတ်နေတဲ့ နင့်ရုပ်နဲ့ ပန်းတွေပွင့်
ဘာဆိုဘာတခုမှမရှိတဲ့ ငါက …
ပန်းကြိုးပြတ်တွေ ကိုင်ငေး …
နင့် ရုပ်သေးကပွဲကလေး
ဘယ်တော့စင်ပေါ်ရောက်မလဲ တွေးတွေးနေတာ
ငါထွေးထွေးနေတဲ့ သွေးတွေထဲမှာ
အရုဏ်အသေဦးတွေ မသန့်ခဲ့တာလဲကြာ ….
လေစီးကြောင်းပြောင်းလဲခြင်း
မှာ
ကိုင်လှုပ်ထားတဲ့ ကြိုးစွဲရာ စွက်ကြောင်း
အဲဒီ … လှောင်အိမ်ထဲကကို မထွက်ကြောင်း
ဖူးပွင့် ပြနေလိုက်တာ …
အပြုံးခြစ်ရာနဲ့ ထာဝရ ကခုန်နေတဲ့ပွဲမှာ
ဟိုး … ဝေး ဝေး က …
ယောက်ျားရော မိန်းမရော
နိုင်လွန်သံယောဇဉ်နဲ့ ရင်တန်းလန်း
ဖျော်ဖြေတင်ဆက်မှု တတိယခပ်ကြမ်းကြမ်းမှာ
ဝေါဟာရ သေဆုံးနေပုံက …
ပွဲလာသူပရိတ်သတ်များ …
ပန်းရုပ် သေတယ်။
nelay
