ပြ စာ တိုက်

အမဲရောင်လမ်းမထက်က စက်တပ်နှလုံးသားများရဲ့

ခြေသံကို ငါက

အစီအစဉ်ပြီးကြောင်း ကြေငြာလိုက်တယ်။

ဆံနွယ်တွေက နှုတ်ခမ်းလွှာကို ဖုံးဖိဆွံ့အ

နှလုံးလမ်းကြောင်း ပေါ်က အမှိုက်တွေ

က နေကြတယ်။

လေတိုးသံကြားမှာ ကြောင်တစ်ကောင်

ဖုန်ထ ။

တိမ်သေရေ …

မဆေးကျောသေးဘူးလား

ငါ့ခေါင်းတွေ ငုံ့ထားရတာ

ကန္တာရတွေ

အ … တယ် ။

နံရံပေါ်ကိုမော့ကြည့်

ငါ့နှလုံးသားဟာ သူငယ်တော်အစစ်

ကြိုးတန်းလန်းနဲ့ နီနေတယ် … ။

ညကြီးမင်းကြီးပြန်လာမှတော့ ညဟောင်တဲ့အသံကို

ကြောက်နေလို့

ခရီးမတွင်ဘူး…။

အတွင်တွင် ခါငြင်းနေတဲ့ နံနက်ခင်းတွေမှာ

မီးခိုးကကြိုးတွေ သိပ် လှ တာ ပဲ … ။

သိပ်ဟောင်းလာတဲ့ တန်ဖိုးတွေကို

ပြတိုက်ထဲမှာ

ဝမ်းနာပြရတာတမျိုး

သွားတိုက်ရတာတမျိုး …။

နှစ်မျိုးပေါင်းပြီး တစ်ခုဖြစ်လာတဲ့

အကြွေစေ့တွေက

ကလေးတွေကို

သိပ် ဟောင်း တာမကြိုက်ဘူး ။

ဘာကိုဆိုလိုပြီး လိုရင်းကိုရောက်ချင်ရ

လိုရင်းဆိုတာ အတိုချုန်းထားတဲ့

ခရီးရှည်တခု ……………………….

ဒါနဲ့

ဟိုး ……….

မြင့်မြင့်

ဂုဏ်ရည်ထက်က

မိ န ငယ် …

ကြား

ကြား

ကြားလား …….

…… ငါ့အမြစ်တွေ

……စာဆိုနေတယ်……။

nelay

လိပ်ပြာလှိုက်သံ

ထိုညဆိုးများစွာ၌ အနက်ရောင်အိပ်မက်ပုရပိုက်ကို

မှတ်ဉာဏ်၏ ကူးလူးယှက်သွယ်ပုံအမှားဖြင့်
နှလုံးသား၌ သွယ်တန်းထားရ၏
အစီအစဉ်များမှာ ထိုသို့လွဲချော်သွားသော
ညရထား၏ ငါ့အံဝှက်ထဲ၌ တိကျစွာခုတ်မောင်းနေကြသည်
လေအေးမှဖြစ်ပေါ်လာသော အသံတို့စွဲငင်ရာမှ
ငါ့မျက်နှာမူရာတိုင်းတွင် လာမည့်၁၄ရက်အလွန်ကို
ညကျိုးအိပ်မက်ထဲမှ မျှား၍မရနိုင်တော့
ထိုရာဇဝင်အပြစ်ဒဏ်မှဆွဲယူသောအခါ
လမင်းငတ်စွတ်ပုံနောက်ပြန်မျက်နှာအားတွေ့ရ၏
ခရေစမ်းကလေးပေါ်မှာ စက္ကူလှေများနှစ်မြုပ်ကြသည်
ပျော်ဝင်သွားသော ပြာတို့၏ခိုတွယ်ငြိကပ်ပုံမှာ
လိပ်ပြာမျက်နှာအား လက်ဖျံသွေးကြောပေါ်၌ပြန်မြင်ရသူ
သူရူး၏ မဟာရက်ကြမ်း အိပ်မက်အဆန်းကြီးသာဖြစ်ခဲ့သည်
ထိုဆံပင်ညှပ်ဆိုင်အား ငါမရောက်ဖူးခဲ့
ကွေးကောက်သော လက်ချောင်းများဖြင့်သာ
အဆာပြေဖြတ်ချဖူးသော မိုက်မဲမှုအရှည်များ၏ဆက်သံ
မေ့လျှော့ခြင်း၏ ထွက်ခွာမှုတစုံတရာကို
စက္ကူလူသားတိုင်း ပြန်တမ်းတဖို့ သုဿန်ကြမ်းပြင်တခြမ်း
ရထားသံလမ်းပေါ်က အေးစက်ခြင်းတစ်စုံတရာကို
နားဖြင့် လှိုက်ခိုပြီးနောက် လမ်းလျှောက်ဖို့ မီးတောက်ကြရသည်
ငါ့အားငါဖြင့် ပြုပြင်မွန်းမံ၍မရသော အခိုက်အတန့်များတွင်
ကြောက်လန့်တကြား နာရီအတွင်းမှ စကားပြောသံများ၏
ချိုမြိန်မှုခါးသီးမှု အသိတရားအတုများဖြင့် ဆုံးမစကားဆိုဖို့မတန်ခဲ့တော့
အဖြူရောင် အိပ်စက်ခြင်းမျိုးဖြင့် တိမ်ငွေ့တို့အားရှုပါ
ကြည်လင်အေးမြမှုဖြင့် မြက်ခင်းတို့အားခိုတွယ်ပါ
တောက်ပသောလောင်ကျွမ်းမှုဖြင့် လမ်းအားထမ်းခေါ်ပါ
မှန်တံခါးပေါ်မှ ရေငွေ့တို့၏ သေဆုံးခြင်းဖြင့်
ရေစီးကြောင်းအား တဖန်ပြန်လည်မွေးဖွား
ငြိမ်းချမ်းခြင်းရပ်ဝန်းမှာ ငါ့တံခါးအားဖြုတ်ထားခဲ့ပြီး
အနီရောင်ဖြစ်တည်မှုမှာ လောင်မြိုက်တောက်ပနေရသည်။

nelay

နတ်ပျိုမ အတွက်ကဗျာပျို့အန်ခြင်း

 

နတ်ပျိုမ အတွက်ကဗျာပျို့အန်ခြင်း

နင့်ကောင်းကင်မှာ

ကြယ်ကြွေတယ်ဆို ...

အတုကြီးလားငါမသိပေမဲ့ ...

မွန်မြတ်ဆုံး ဆုတစ်ခုကိုတောင်း

ဆောင်းမရောက်ခင် နင်အောင်မြင်ပျိုမြစ်ပါစေကြောင်း ...။

ငါ့ရင်ဘတ်ပေါ်ဖြတ်ကြွေသွားတဲ့ ကြယ်

နင်တစ်ယောက် အောင်မြင်ပါစေကွယ် ...။

မြက်ခင်းပေါ်က နှလုံးသွေးတဖုံ

တလျှပ်လျှပ်ခုန်နေသေးတယ်

အခုတော့

ကြယ်တွေခဏခဏကြွေလဲ ငါမဖြုံတော့ဘူး ...။

ခရေပင်တွေအများကြီးစိုက်ပျိုးပေမဲ့

ခရေတွေပွင့်လို့ကုန်

ရောင်းလို့ကုန်

ကြွေလို့ကုန်

ရနံ့တွေစားသုံးလို့ကုန်သွားတယ် ... ။

မျက်ရေသေဆုံးခြင်းနဲ့ ကြယ်သေကို

စနေ ငါ ...

ကောင်းကင်ပေါ် ပြန်ကပ်ပေးလိုက်တယ် ... ။

လပြည့်နေ့မှာ ...

နင်ဘယ်လိုနေလဲ ငါမတွေးတော့ဘူး ...။

အုတ်ဂူထဲကဆောင်းနဲ့

အပြင်ကဆောင်း ဘာကွာလဲ

ငါ အတိုင်းအထွာမတတ်ခဲ့ ....။

မြက်ခင်းကိုတိုင်တည်ပါတယ်

မနက်ခင်းကို အလွမ်းမပျိုးတော့ဘူး

ငါ့ကို စကားသတ်ခွင့်ပြုပါ ...။

ကန်ဘောင်တခြမ်းကို ငါဖြတ်သိမ်းထားလဲ

လပျက်ညဟာ နင့်ခေါင်းပေါ်မှာ

သေလျှက်လင်း ...

အဆိပ်တွေခင်းကျင်းထားတဲ့ ရင်ခွင်နွေဦးမှာ

နင်မေ့သွားတဲ့ ငါ့မွေးဖွားသေဆုံးခြင်းရှိတယ် ...။

နင်နဲ့ငါ့ရဲ့ကြိုး

ကြိုးပီသစွာ ပြတ်တောက်ထိုးစိုက် ....

ဘဝက အပျက်မရင်ခွင်လောက်မမိုက်တော့ဘူး ...။

မြက်ခင်းပေါ်က အခြောက်မလေးရေ ...

သတ္တိနဲ့မာယာကို အလှဲအလှယ်လုပ်လိုက်တာလား ...

ဒါဆို

ငါ့ကိုစစ်သူကြီးလို့ခေါ်ပြီး နောက်လိုက်မပါတဲ့

ဒေါင်းယောင်ဆောင် ကျီးမဲတွေကြား

ခန္ဓာကိုအဆိပ်ကြွေးပြီး

ငါ့ဝိဉာဉ်အား အလင်းသေခွင့်ပြုပါ ...။

nelay

နိုးထလာတဲ့ ပွင့်ငုံ့တော

နင်ဟာငါ့ကောင်းကင်တခုလုံး ခွာချသွားပြီးမှ

ငါ့ကိုဘာလို့ အမျိုးမျိုး ငိုပြရတာလဲ တိမ်ပျို

နေလုံးတွေ တီရှပ်ပေါ်မှာ ကောက်ယူချယ်သထားတာပဲ

ငါ့ကိုဘာလို့ အစိမ်းလိုက် မုန်းပြချင်ရတာလဲ ကမ္ဘာရယ်

တညို့ညို့ အုပ်ဆိုင်ပြီးမှ . . .

ငါဆိုတဲ့သက်တန့်က ကွေးလာခဲ့ရတာပါ

မင်းနှုတ်ခမ်းလေးဆူပြမှ ရေတံခွန်တွေ . . .

ငါ့ရွာကိုတိုက်စားသွားရတာလေ

စွန်တကောင်ရဲ့ မျက်လုံးအောက်မှာ . . .

ပန်းခင်းကြီးတခုလုံးပျောက်ဆုံးသွားပြီ

ပွင့်တောရဲ့ ဘယ်ဖက်ပါးပြင်က အမှတ်လေးဟာ . . .

ငါတမ်းတမ်းတတ အမှတ်ရနေတဲ့ အငုံ့လေး တခုပေါ့

ပြန်ပြန်တွေးတိုင်း ခြေရောလက်ရော လိမ်နေခဲ့တာ

ကြည့်တဲ့သူတိုင်းမရှင်းကြဘူး . . .

ပြောမရဆိုမရ ပတ်တီးပရဗွနဲ့

ငါ့ပါးစပ်တွေ ချစ်တယ်ကြီးပဲ လှိမ့်လှိမ့်ထွက်နေတယ်

တိုက်တွေကုန်းရုံး လာပြီးလေ

ဟေမာန်တောကို ငုံ့ကြည့်တော့မယ် နွေနှင်း . . .

နင့်အမြင်တွေ ရှင်းအောင် နင့်မျက်နှာပေါ်က

ဆံနွယ်လှလှတွေ ငါ့ဘဝနဲ့ယူငင်ရှင်းပါရစေ

အနီရောင် မြက်ခင်းတွေ ကြီးထွားလာလိုက်တာ

ငါ့ပြတင်းမှာ မွှန်းကြပ်အောင် စိမ်းနေကြပြီ

ငါ့ကိုယ်ငါပြန်မမြင်ရဘူး ပွင့်ငုံ့ . . .

လေတွေအဟုန်လိုက် တိုက်နေကြပြီး . . .

နွေနှင်းရယ် . . . ။

nelay

အကောင်းတွေပြည့်နေတဲ့ ထောပတ်သီး တခြမ်းပုတ်

ရင့်လာရင်မဲသလောက် အတွင်းထဲမှာ စိမ်းပုတ်ချို

ခပ်ပြစ်ပြစ်ကလေးဖျော်သောက်လို့ ကောင်းကောင်းချိုတယ် .. ။

ရနံ့တွေငိုနေသလား ငါ့ကိုယ်ငါပြန်တိတ်ယူရအောင်ကောင်းတယ် ... ။

ခကွေးပေါ်က ကကြီးက ကောင်းပါတယ်။

နေဝင်သွားတာ ကမ္ဘာကြီးရဲ့ နောက်တခြမ်းအတွက်ကောင်းတယ်။

ကောင်းတယ်ထင်ရင် လူသတ်ပွဲလဲ ကြည့်လို့ကောင်းတယ်။

ယုန်ကလေးရဲ့ နိမိတ်ကောင်းလဲကောင်းတယ်။

အီမိုအဖွဲ့ လဲကောင်းတယ်။

၁၆နှစ်ပြောင်းပြန်လှန်ထားတဲ့ အဆိုတော်လဲကောင်းတယ်။

ကောင်းပါတယ် မီးပျက်တော့ လူကြီးတွေနားအေးတာပေါ့။

ကလေးတွေ လမ်းမှာပေါ်မှာ အမှောင်ခန်းထဲမှာ ကောင်းတယ်။

ဆီဈေးတွေ ''မျောက်" တက်တော့ ကောင်းတာပေါ့။

ဒီလိုခပ်ချဉ်ချဉ်စာတွေလဲတမျိုးကောင်းတယ်။

ရန်ကုန်မြို့ကြီးက ကောင်းပါတယ်။

အဝါရောင်တွေလဲကောင်းတယ်။

အစိမ်းရောင်တွေလဲကောင်းတယ်။

မြန်မာပြည်ကြီးလဲ ကျနော်တို့ကလွဲရင်

ပိုးစိုးပက်စက်ကောင်းနေပါတယ်။

အစာထိုးကုသတာလဲ ကောင်းတယ်။

ပြန်လာတာလဲကောင်းပါတယ်။ စကားပြောရတာကောင်းတာပေါ့။

ပြန်မယ်မနှုတ်ဆက်တော့ လက်ညောင်းသက်သာလို့ ပိုတောင်ကောင်းသေး ... ။

ကောင်းလိုက်တဲ့ စကားလုံးတွေ ကောင်းကောင်းထ

လိုက်ကောင်းနေတဲ့ သတ္တဝါတမျိုးဟာ

ကိုလိုနီလိုခွေးဖြစ်သွားအော င် ဝါးမျိုကောင်းပြ။

ဒါလဲသက်တမ်း အိုမင်းဟောင်းနွမ်းခြင်းရဲ့ သော့ကောင်းကောင်းတွေ။

မိုးကောင်းတိမ်တို့ရေ ....

ငါလဲ ဆောင်းဦးပေါက်နှင်းလို သိပ်ကောင်းပြတတ်ပါတယ်။

ကြက်တောထဲက လင်းယုန်ဖြစ်ဖြစ်

ဝေဟင်ထက်က လင်းယုန်ဖြစ်ဖြစ်

အတ္တအကောင်းစားတွေတောင်ပျံတပ ်ထားတဲ့

ပိုက်ကွန်ကြိုက်သတ္တဝါအကောင်းစားကြီးတွေ .. ။

သန့်စင်မှုလေကောင်းတွေရှုရှိုက်ကြ ..... ။

နဲနဲမြင့်လို့မော့ကြည့်ရတာက လွဲရင်

သွေးပျက်ချင်စဖွယ်မိန်းမက အထင်ကြီးစရာအကောင်းသား။

ပြုတ်လာရင် အရှင်းဆုံး ဗလာနယ်နဲ့ ကောင်းကောင်းဖမ်းထားမယ်။

ငါကောင်းကောင်းမအိပ်ရသေးလို့ပါ။

အောင်မြင်မှုဖွယ်တယ်တယ်များက ို တချွင်ချွင်မြည်သံစွဲနဲ့

သေရင်အတူတူရောက်မဲ့နေရာက ပြောသံဆိုသံတွေထဲမှာ

တော်တော်ကောင်းတယ်ဆိုပဲ .. ။

လက်ညှိုးထိုးတိုင်း လိုတာရခဲ့တဲ့ ငယ်ဘဝမဟုတ်ခြင်းများနဲ့

မနက်ဖြန်ကိုအကောင်းဆုံးရင်ဆ ိုင်ဖို့

ငါ့လက်ချောင်းတွေကောင်းကောင်းဖြတ်ထားတယ်။

(ပူစာမိမှာစိုးလို့)

အကောင်းဆုံးကြိုက်သူကြီးတွေ ရေ ....

နှလုံးသားမပါတဲ့စက်ရုပ်တွေမဟုတ်တော့ဘူး။

အကောင်းဆုံး သံချေးတက်လိုက်ကြအုံးပေါ့။

တာဝတံသာ တက်ပြီးသာ အကောင်းဆုံး ဖက်ငိုလိုက်ပါတော့

ကောင်းကောင်းသေမဲ့ကောင်လေး ရောဂါတခြမ်းပုတ်တွေ

ကောင်းကောင်း ဖမ်းယူမျိုချလို့ကောင်းနေတယ်် ... ။

nelay