သို့ ... အဖြောင့်စာ

ညီလေးရေ ...

ဂျီမေးလ်ကနေ ဆုတောင်းတစ်ခုပို့လိုက်တယ်

တစ်စက္ကန့်ကို မျက်ရည်ဘယ်လောက်ကျမလဲ

အင်တာနက်မြို့ရွာမှာ

ဆုတောင်းသံတွေသာ လှိုက်ပြိုဖုံးသွားမယ်

ကမ္ဘာကြီးကရှိုက်ကြီးတငင် ရက်စက်နေတုန်းပဲ

(၆၆၆)အေဒီဘယ်လောက်က သူ့ကိုငါတို့ဘာလုပ်ခဲ့လို့လဲ

ညီလေးရေ အညှိုးတွေရှိခဲ့ရင် တေးမထားပါနဲ့လား

အီးမေးလ်တွေ ပြည့်လျှံအောင်ဆုတောင်းလိုက်စမ်းပါ

အလကားရတဲ့ မေတ္တာတရားတွေ မဟုတ်လား

နောက်ဆုံးတော့လဲ ....

အမေ့မျက်ရည်တွေ LCD နောက်မှာ

မီးလောင်းတာကိုငေးကြ

ရေကြီးတာကိုငေးကြ

စစ်ဖြစ်တာကိုငေးကြ

မတရားလုပ်တာကိုငေးကြ

သင်္ကြန်ကျတာကိုငေးကြ

အနှေးပြကွက်နဲ့ပြန်ရစ်ကြည့်ရင်း

ငါတို့ငေးကြယုံပေါ့ ...။

Pagan တစ်ယောက်ရဲ့ပြန်တမ်းစာမှာ

ညီလေးရေ ဝမ်းနည်းစာကို အလင်းထဲပို့လွှတ်

ဘာသာတရားတစ်ခုခုနဲ့ လူစိတ်ကိုဖြစ်ညှစ်မွေး

ဒါတောင်

မင်းရင်ထဲက ငတေက ဒုက္ခတွေကို

လက်ခုပ်တီးချင်နေသေးတယ် ... ။

ခပ်မာမာဖွင့်လိုက်တိုင်း

ညီလေးရေ အမှောင်ထဲမှာ စာတစ်စောင်ရောက်နေတယ်

နှလုံးသားထဲက ကြောင်တစ်ကောင်နဲ့

မင်းခေါင်းပေါ်က မျောက်ကို

အခွင့်အရေးမပေးမိစေနဲ့ ...

အိပ်ပေါက်ထဲ ဖားတွေမထည့်မိဖို့နဲ့

ကလေးတွေငိုရင်

အိပ်ဆေးသောက်ပြီး အိပ်ဖို့လဲ မမေ့ပါနဲ့ ...

အမှားတွေက အမှန်နှစ်ခု ကြက်ခြေခတ်ထားတာမို့

အဖြောင့်မြင်တိုင်း ခြေလှမ်းမပြင်မိစေနဲ့ ... ။

ငြိမ်းချမ်းတဲ့ရင်ခွင်မှာ

အမေ့နာမည် ပီသစွာ ခေါ်တတ်လာရင်

မင်းအိမ်အပြန်ကို တိမ်ကိုးပေါ်က

မလွတ်မြောက်နိုင်တဲ့ ငါတို့ကြိုနေပါ့မယ်ကွာ ... ။

nelay