Pages

Friday, January 17, 2014

မိုးဇက် မြို့ရောက်တော့ သူ့အဖေဆီ ဒီလို စာရေးတယ်



သက်ရှိသက်မဲ့ ရုပ်ဝါဒီနဲ့ တစ်ယောက် ဝဋ် ကို တစ်ယောက်ပြန်ကြည့်ပါတယ်
တစ်ယောက် အနာ ကို တစ်ယောက်အကြွေးလဲပြီး မိဘတွေကို ဒူးထောက်ရှိခိုးဦးချပါတယ်


ကိတ်မုန့်ပေါ်မှာ ယင်မနားအောင် ဖယောင်းတိုင်ထွန်းပြီး လေတွေစုလို့ အားရပါးရမှုတ်ထုတ်ပါတယ်
ကျောကုန်းအမဲပေါ်က ဆေးပျယ်နေတဲ့ လူကူးမျဉ်းကျားပေါ် ငါတို့လက်ကိုမြဲမြဲတွဲလို့ ကူးပါတယ်


နတ်ဆိုးတွေကို ပြုစုယုယပြီး အလှူခံကိုလည်း ငွေတွေ ထည့်ပါတယ်
ပင်လယ်ပြင်ပေါ် ဖြတ်တိုက်လာတဲ့လေတွေကို ရှုရှိုက်ပြီး အနာဂတ်မရှိတဲ့ အိပ်မက်ကိုနှစ်နှစ်ခြိုက်ခြိုက်မက်ပါတယ်


Restart ခလုတ်ကို ခဏခဏ နှိပ်ပြီး ဘဝကို ခဏခဏပြန်စဖို့ ပါးစပ်တွေအကျယ်ကြီးဟ လို့ ပြုံးပါတယ်
သိပ်ချစ်တယ်ဆိုတဲ့ စကားကို လိုအပ်မှပြောတတ်ဖို့ ကင်ဆာရောဂါပါတဲ့ အစားအစာကို တစ်ပတ် တစ်ခါမှန်မှန်စားပါတယ်


ကဗျာတွေမှာပါတဲ့ ဂီတအသံကို လူတွေမကြားအောင် တီးတတ်ဖို့ နှလုံးသားကို လူ့အဖွဲ့အစည်းထဲက ထုတ်ထားပါတယ်
အမြင်အာရုံကို အကြားအာရုံ နဲ့ ဖျော်ဖြေတင်ဆက်ရင်း ဖုန်းဘက်ထရီကိုလဲ အားမှန်မှန်သွင်းထားပါတယ်


ကျေးဇူးတရားကို ကိုယ့်အရပ်နဲ့တိုင်းပြီး ၅ပေ ၇လက်မ ဗီနိုင်းနဲ့ ပရင့်ထုတ်လို့ ဘုရားကျောင်းတော်အောက်မှာ ကပ်ထားပါတယ်
မိန်းမယူဖို့နဲ့ မိဘလုပ်ကြွေးဖို့ အိပ်မက်အလယ်က Volume ကိုလဲ အဆုံးထိတင်လို့ ချဲ့ထားပါတယ်


မြို့ပြ လူနေမှုမှာ ပျဉ်းရိညီးငွေ့လာရင် မျောက်ပွဲတွေ ကြည့်ဖို့နဲ့ အောက်လမ်းက ကားကိုစီးဖို့တစ်ခါတစ်ခါစိတ်ကူးမိပါတယ်
မြို့လယ်ခေါင်မှာ တိုက်တွေပေါ်မှာ တိုက်တွေကြားမှာ ဓါတ်လှေကားမှာ စက်လှေကားမှာ ဘုရားပေါ်မှာ အလုပ်ခန်းထဲမှာ တီဗီရောင်းတဲ့ဆိုင်မှာ ကွမ်းယာဆိုင်မှာ ဖုန်းရောင်းတဲ့ဆိုင်မှာ အခပေးအိမ်သာထဲမှာ ရုပ်ရှင်ရုံမှာ ၁၉လမ်းမှာ ကျန့်တိတ်တရုတ်ကျောင်းမှာ အမျိုးသားစာကြည့်တိုက်မှာ စာပေဗိမာန်မှာ ရုပ်ရှင်အစည်းအရုံးမှာ ကားပွဲစားတန်းမှာ ခြံနဲ့ဝင်းနဲ့ ဝက်သားဒုတ်ထိုးဆိုင်ထဲမှာ အဖေ တွေများလို့ ဘယ်သူ့ အဖေခေါ်ရမလဲ စိတ်ကို မွေးထားပါတယ်


အဖေ မသိတဲ့ Facebook ပေါ်မှာ လူတွေအမှန်တကယ်မျိုးပွား နေကြောင်း နောက်တစ်စောင်မှာ ရေးလိုက်ပါ့မယ်
အပေါင်းအသင်း နဲ့ ရောင်းရင်းနဲ့ စားလို့ရတဲ့ အဟာရကို MRTV4 က လာ ဗျူးရင်ဖြေဖို့ ပွဲမှန်သမျှကိုလဲ မှန်မှန်တက်ပါတယ်


လူတွေ စိတ်ဆင်းရဲပြီး ဒုက္ခရောက်မှ ရာထူးတက် လစာကောင်းတဲ့ ဘစ်ဇစ်နပ် သီဝရီကို ကမ္ဘာပြုကျမ်းထဲမှာ မတွေ့ပေမယ့် ဒီမြို့ မှာတွေ့လိုက်ရလို့ အဖေ့ကိုပြဖို့ ဖုန်းနဲ့ဓါတ်ပုံရိုက်ပြီး ဒီစာနဲ့ အတက်ချ် လုပ်လိုက်ပါတယ်


စာဖတ်ရတာ စိတ်မရှည်တဲ့ အဖေ့ စိတ်ကိုသိလို့ တချို့ နာမဝိသေသနတွေ နာမ်စားတွေဖြုတ်ထားခဲ့ပါတယ်
စောက်သုံးမကျတဲ့ သားစာကို ဖတ်ပြီး စွတ်မယုံဖို့လဲ မှားချင်ပါတယ်



nelay





မိုးဇက် မြို့တက်တော့ သူ့အဖေက ဒီလိုမှာတယ်



ကြက်သီးထလောက်အောင် စကားလုံးတွေပြူးပြနေတာ
ခြေမကိုက်ပြီး ရယ်လိုက်ရတယ်


အားလုံးတိတ် . . .
ပွဲပြီးမှလက်ခုပ်တီးပါ
ပြန်ဆိုပါ
ကော်ပီကူးပါ
ပြီးရင် နာရေးပါကူညီပါ
အားလုံး Censor ကျပြီးသားတွေပါ
အားမရသေးရင် မီးဖွားကူညီမှုအသင်းပါ ဖွဲ့ပါ
အပျက်မတွေမတိုးကြနဲ့
International ဆန်ဆန် တန်းစီပါ


လူကြီးလက်မှတ်မလိုပါဘူး
ကလေးလက်မှတ်ရှိရင် လုံလောက်ပါပြီ


၅၀ ထက်မကျော်ရ
ကျော်ရင်ပြန်အမ်းမည်မဟုတ်ပါ


မှုတ်ဆိတ်ထားပါ သကြားသုတ်ပါ
ပျားဆွဲဖို့ ပြတင်းပေါက်မှာ မတ်မတ်ရပ်ပါ


အဒေါ်ကို မိဒွေးတော်ဖို့ အားမွေးပါ
လောကမှာ ရှိသမျှ မိန်းမအားလုံး မိခင်ပဲလို့ အဆိုပြုပါ


စိတ်ဖြေဖို့ ဆင်းရဲသား ရုပ်ရှင်ကြည့်ပါ
သိပ်နာပြရင် ကြည့်မကောင်းတော့ဘူး


ဒီနေရာမှာ ခင်မောင်တိုးရဲ့ ဆည်းလည်းလှိုက်သံကိုကျယ်ကျယ်ဖွင့်ထားပါ
အမှားနဲ့အမှန်ဆိုတာ အတ္တရဲ့တယူသန်စိတ်ကူများဖြစ်တယ်
L ဆိုင်းဇီ နားထောင်ပြီး L လွန်းဝါရဲ့ မျက်ဝန်းကိုစိုက်ကြည့်ပါ
L ဇေးရှင်း အကိုက်ခံဖို့ ခြေသလုံးသားတွေ ဖွင့်ထားပါ


အခုမြင်နေကြ အဘိုးကြီးတွေလို ရွှေထုတ်ကြီးပိုက်ပြီး
Withdraw နဲ့ ရက်တွက်ပါ အတိတ်ကို ဖီလ်လင် တက်ပြီး
Ozzy Osbourne နားထောင်ပါ


Jme နဲ့အောင်ကိုလတ် သားအဖ ဖြစ်ကြောင်းရဲရဲကြီးလက်ခံပါ
ဘောင်းဘီဝတ်ပြီး လိင်မဆက်ဆံပါနဲ့
ဆေးလိပ်ကို 90 ဒီဂရီ ထောင်ပြီးမသောက်ပါနဲ့
တောသားဆန်တဲ့အပြုအမူဖြစ်ကြောင်းသတိပြုပါ


မင်းရဲ့ကလေးတွေကို ဆူပူကျိန်းမောင်းရိုက်နှက်ခြင်းကိုရှောင်ပါ
ကလေးတွေဆိုတာ တချိန်မင်းကို ပြန်လုပ်ကြွေးနိုင်တဲ့ ကျွန်ကောင်းတွေဖြစ်ပါစေ
မင်းကိုယ်တိုင်တော့ ကျွန်ကောင်းတစ်ယောက် မဖြစ်ပါစေနဲ့


စာအုပ်တွေကိုဖတ်ပါ စာအုပ်ကြီး မဖြစ်ပါစေနဲ့
မင်း အဖေ ငါ အခုရေးတဲ့ စာကိုလဲ စောက်သုံးမကျတဲ့ ဦးနှောက်နဲ့ စွတ်မယုံပါနဲ့ ။






nelay